Pastilan ning kawad-on sa kinabuhi
Maoy motukmod sa pag-panimpad
Sa halayong dapit molupad
Biniyaan ang pamilyang ginamanggad.
Ang kahinam dili mahitupngan
Kay lagi nadawat man magtrabaho
Sa laing nasud nga wa pa masinati’g maadto
Ay, kawad-on, nakit-an na ang remedyo.
Sa kalipay ang ngisi abot sa dunggan
Sa adlawng gitakda nga molarga na
Mga minahal sa kinabuhi nahingawa
“Ay’g kabalaka, ok ra kaayo ko.” Asa ka?
Hay salamat, naabot na gyud mi sa Jeddah
Almabani, ang kompanya nga among trabahoan
Kami ni Dennis sa KAIA project nagkauban
Si Roel sa Taif ug si Ramil sa Hail gipadpad sa kapalaran.
Unya ang kahinam ug kakulba sa hinayhinay mitikyaop
Ug mibanos pagkuyanap sa among kahiladman
Ang gibati nga, ambot, di mahisabtan.
Kamingaw sa pamilya di mahilabwan.
Pinaagi sa text kami nagdayganay sa among gibati
Aron mahunaran ang kasakit, kami nagtinambagay
“Nganong ni enter!” Pasiaw namo’g gamay
Aron kami malagsik pod ug makalahutay.
Among gihunahuna na lang ang mga problema
Sa Pilipinas nga among gibilin nagtumpi
Kinahanglan nga di mi magpada sa bul-og sa pagbati
Aron ang hinungdan sa paglangyaw di malugti.
Ang Ginoo nga maoy among gidangpan ning kagul-anan
Sa pamilyang gibiyaan apan way puas ang suporta
Kami maisugong moasdang batok ning kamingawa
Ning atong pagsakripisyo, kita pagagantihan ra.
No comments:
Post a Comment