Pirst Taym Nakong Na Homsik

Niadtong gipahunong ko’g eskwela human sa elementarya
Pag-adto sa Negros kuyog sa taga-amoa maoy akong gikursonada
Aron manabang ug sanggi iyawat makabahin ug mais unya makakwarta
Bisan ang kalibanga wa makasanta pagkuyog nako ni Nang Carda
Gikan sa Toledo tabok sa lawod luwan sa tayaong lansa.

Alegre mi kaayo padulong sa Maglahos sakay sa dikarga
Gitadlas namo ang lapad nga katubhan unya sa bukid pasaka
Ako ray bata, kauban nako mga tiguwang ug mga dalagita
Palis na sa abtanang kawayang balay kami nahasaka
Sa tiilan sa Bolkang Canlaon ang maong lugar pastilang tugnawa.

Sa pag-abot gilayon namo sa pagpananggi kami niarangkada
Ang kalapoy ug kakapoy sa biyahe wa na namo panumbalinga
Bisan sa akong kasibot ug kaikag, akong giangkon usa ka gablang ra
Pero nagkilomkilom na lang ang akong sangkoanan halayo pa
Nakabahin ra intawn kog tunga sa sakong mais nga pakpakan pa.

Among giabutan way kasilyas ug dagitabnong suga
Magabii sa katubhan mi magpabuhagay magkantakanta
Haskang ngioba! Haskang tugnawa! Wa ma ni sa amoa!
Mangatog mi sagol talay anha sa sala nga pastilang sikita
Usahay makatanday tag dalagita o tiguwang nga nawalis ang saya.

Dantan ug usa ka semana sayo sa buntag sa bungtod ako mosaka
Akong tan-awon ug aninawon ang pikas tampi nga tumong sa amoa
Tua didto akong walo ka mga igsuon, si Nang Angkay, si papa ug mama
Wa ko kasabot sa akong gibati. Mohilak ko. Motawag ko ni Mama.
Mirise!. Ngano nagtuman sa gusto! Biaybiay pa sa akong konsinsya.

Iniglugsong nako balik, kataw-an ko nila kay akong mata namurot na
“Sus, ing-ana gyud na basta primiro pang buwag sa pamilya.
Di malikayan, mingawon gyud sa gibiyaang mga hinigugma
Da, sa ngadtongadto maanad ra lagi ka ug ang kasakit mawagtang ra.”
“Mao ba? Pastilan ning kalakiha, hasol kaayo, way ayo, way nada.”

Gusto nako mouli bisan tunga ra sa sako akong mais, pero wa koy kwarta.
Di pa sila manguli kay naa pay daghang sanggiunon, mangiyawat pa.
Wa koy nahimo. Giluom ko na lang ang kamingaw sa akong pamilya
“Mag-usab pay layog.” Di gyud nako malimtan tong experensiyaha.
Pirstaym nako tong mabuwag sa amoa. Homsik kuno to ingon nila.